(89) 6. อตีตานาคตารมฺมณกถา
[559] อตีตารมฺมณํ จิตฺตํ อนารมฺมณนฺติ? อามนฺตาฯ นนุ อตีตารมฺมณนฺติ? อามนฺตาฯ หญฺจิ อตีตารมฺมณํ, โน จ วต เร วตฺตพฺเพ – ‘‘อตีตารมฺมณํ จิตฺตํ อนารมฺมณ’’นฺติฯ อตีตารมฺมณํ จิตฺตํ อนารมฺมณนฺติ มิจฺฉาฯ หญฺจิ วา ปน อนารมฺมณํ, โน จ วต เร วตฺตพฺเพ – ‘‘อตีตารมฺมณ’’นฺติฯ อนารมฺมณํ อตีตารมฺมณนฺติ มิจฺฉาฯ
อตีตารมฺมณํ จิตฺตํ อนารมฺมณนฺติ? อามนฺตาฯ นนุ อตีตํ อารพฺภ อตฺถิ อาวฏฺฏนา…เป.… ปณิธีติ? อามนฺตาฯ หญฺจิ อตีตํ อารพฺภ อตฺถิ อาวฏฺฏนา…เป.… ปณิธิ, โน จ วต เร วตฺตพฺเพ – ‘‘อตีตารมฺมณํ จิตฺตํ อนารมฺมณ’’นฺติฯ
[560] อนาคตารมฺมณํ จิตฺตํ อนารมฺมณนฺติ? อามนฺตาฯ นนุ อนาคตารมฺมณนฺติ? อามนฺตาฯ หญฺจิ อนาคตารมฺมณํ, โน จ วต เร วตฺตพฺเพ – ‘‘อนาคตารมฺมณํ จิตฺตํ อนารมฺมณ’’นฺติฯ อนาคตารมฺมณํ จิตฺตํ อนารมฺมณนฺติ มิจฺฉาฯ หญฺจิ วา ปน อนารมฺมณํ, โน จ วต เร วตฺตพฺเพ – ‘‘อนาคตารมฺมณ’’นฺติฯ อนารมฺมณํ อนาคตารมฺมณนฺติ มิจฺฉาฯ
อนาคตารมฺมณํ จิตฺตํ อนารมฺมณนฺติ? อามนฺตาฯ นนุ อนาคตํ อารพฺภ อตฺถิ อาวฏฺฏนา…เป.… ปณิธีติ? อามนฺตาฯ หญฺจิ อนาคตํ อารพฺภ อตฺถิ อาวฏฺฏนา…เป.… ปณิธิ, โน จ วต เร วตฺตพฺเพ – ‘‘อนาคตารมฺมณํ จิตฺตํ อนารมฺมณ’’นฺติฯ
ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ สารมฺมณนฺติ? อามนฺตาฯ อตีตํ อารพฺภ อตฺถิ อาวฏฺฏนา…เป.… ปณิธิ, อตีตารมฺมณํ จิตฺตํ สารมฺมณนฺติ? น เหวํ วตฺตพฺเพ…เป.… ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ สารมฺมณนฺติ? อามนฺตาฯ อนาคตํ อารพฺภ อตฺถิ อาวฏฺฏนา…เป.… ปณิธิ, อนาคตารมฺมณํ จิตฺตํ สารมฺมณนฺติ? น เหวํ วตฺตพฺเพ…เป.…ฯ
อตีตํ อารพฺภ อตฺถิ อาวฏฺฏนา…เป.… ปณิธิ, อตีตารมฺมณํ จิตฺตํ อนารมฺมณนฺติ? อามนฺตาฯ ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ อนารมฺมณนฺติ? น เหวํ วตฺตพฺเพ…เป.…ฯ
อนาคตํ อารพฺภ อตฺถิ อาวฏฺฏนา…เป.… ปณิธิ, อนาคตารมฺมณํ จิตฺตํ อนารมฺมณนฺติ? อามนฺตาฯ ปจฺจุปฺปนฺนํ อารพฺภ อตฺถิ อาวฏฺฏนา…เป.… ปณิธิ, ปจฺจุปฺปนฺนารมฺมณํ จิตฺตํ อนารมฺมณนฺติ? น เหวํ วตฺตพฺเพ…เป.…ฯ
[561] น วตฺตพฺพํ – ‘‘อตีตานาคตารมฺมณํ จิตฺตํ อนารมฺมณ’’นฺติ? อามนฺตาฯ นนุ อตีตานาคตํ นตฺถีติ? อามนฺตาฯ หญฺจิ อตีตานาคตํ นตฺถิ, เตน วต เร วตฺตพฺเพ – ‘‘อตีตานาคตารมฺมณํ จิตฺตํ อนารมฺมณ’’นฺติ…เป.…ฯ
อตีตานาคตารมฺมณกถา นิฏฺฐิตาฯ
9. นวมวคฺโค
(90) 7. วิตกฺกานุปติตกถา
[562] สพฺพํ จิตฺตํ วิตกฺกานุปติตนฺติ? อามนฺตาฯ สพฺพํ จิตฺตํ วิจารานุปติตํ ปีตานุปติตํ สุขานุปติตํ ทุกฺขานุปติตํ โสมนสฺสานุปติตํ โทมนสฺสานุปติตํ อุเปกฺขานุปติตํ สทฺธานุปติตํ วีริยานุปติตํ สตานุปติตํ สมาธานุปติตํ ปญฺญานุปติตํ ราคานุปติตํ โทสานุปติตํ…เป.… อโนตฺตปฺปานุปติตนฺติ? น เหวํ วตฺตพฺเพ…เป.…ฯ
สพฺพํ จิตฺตํ วิตกฺกานุปติตนฺติ? อามนฺตาฯ นนุ อตฺถิ อวิตกฺโก วิจารมตฺโต สมาธีติ? อามนฺตาฯ หญฺจิ อตฺถิ อวิตกฺโก วิจารมตฺโต สมาธิ, โน จ วต เร วตฺตพฺเพ – ‘‘สพฺพํ จิตฺตํ วิตกฺกานุปติต’’นฺติ ฯ
สพฺพํ จิตฺตํ วิตกฺกานุปติตนฺติ? อามนฺตาฯ นนุ อตฺถิ อวิตกฺโก อวิจาโร สมาธีติ? อามนฺตาฯ หญฺจิ อตฺถิ อวิตกฺโก อวิจาโร สมาธิ, โน จ วต เร วตฺตพฺเพ – ‘‘สพฺพํ จิตฺตํ วิตกฺกานุปติต’’นฺติฯ สพฺพํ จิตฺตํ วิตกฺกานุปติตนฺติ? อามนฺตาฯ นนุ ตโย สมาธี วุตฺตา ภควตา – สวิตกฺโก สวิจาโร สมาธิ, อวิตกฺโก วิจารมตฺโต สมาธิ, อวิตกฺโก อวิจาโร สมาธีติ [ที. นิ. 3.305, 353]? อามนฺตาฯ หญฺจิ ตโย สมาธี วุตฺตา ภควตา – สวิตกฺโก สวิจาโร สมาธิ, อวิตกฺโก วิจารมตฺโต สมาธิ, อวิตกฺโก อวิจาโร สมาธิ, โน จ วต เร วตฺตพฺเพ – ‘‘สพฺพํ จิตฺตํ วิตกฺกานุปติต’’นฺติฯ
วิตกฺกานุปติตกถา นิฏฺฐิตาฯ
9. นวมวคฺโค